Jamaica: Diferență între versiuni

 

Anglutnes isindoj jekh Indigenosqi populàcia kaj bućhol Taìno, e ìzola areslǎs te avel telal o Śpanǒlikano thagaripen pala o areslipen e Kristobal Kolumbosqo anθ-o berś 1494. But maśkar e indigenosqe manuśenθe sas murdarde vaj mulǐne anθar e nasvalimata, thaj pala godo e Śpanǒlurǎ anθǐne buteder roburǎ anθar i Afrìka te keren butǐ anθ-i Źämàjkä. E ìzola aćhlǎs jekh Śpanǒlikani phuv ʒi k-o 1655, kana i Ànglia (maj palorral, i Bari Britània) lǎs e ìzola thaj dǎs la jekh nevo anav, Źämàjkä. Telal o koloniàlo thagaripen e Bare Britànǎqo i Źämàjkä avlǎs o maj baro zaxaresqo bićhalutno them, jekhe plantàciaqe ekonomǎça kaj trebelas Afrikane roburǎ thaj palorral penqe ćhave. E Britanikane agorutnes biphandavdǐne e roburěn anθ-o berś 1838, thaj but biphandavde alosardǐne te kultivisaren tikne agrikulturipnasqe phuvǎ p-o than te keren butǐ anθ-e bare plantàcie. Śirdindoj anθar ël berśa 1840-1849, e Britìśurǎ vaj Britanikane manuśa astardǐne te labǎren te keren butǐ anθ-e bare plantàcie e butǎrne kaθar o Xitaj thaj o Xindusthan (vaj Bharat, prinʒardi aděs vi sar e India). E ìzola areslǎs te avel indepènto kaθar o Jekhethanǎrdo Thagaripen (vaj Bari Britània) p-o 6-o agòsto 1962.