Reichszentrale zur Bekämpfung des Zigeunerunwesens

O jekhto śingalo Informaciaqo Serviso vaś e Sekuritatǎqe Śingale karing e Cigojnenθe (Germanikanes: Nachrichtendienst für die Sicherheitspolizei in Bezug auf Zigeuner), skurtǎrdo anav: Zigeunerzentrale, sas astardo anθ-o berś 1899 anθ-i Diz e Śingalenqi anθar o München. Kado informaciaqo serviso sas o modèlo vaś avere themutne thaj maśkarthemutne śingalesqe antiziganosqe programurǎ. Anθ-i Weimar Republika, sa e Germanikane state dine love thaj hasnisarde kado serviso. Lesqi butǐ sas te kidel informàcia pala le Rromenθe anθ-jekh ginavnǎqi-bàza sosqe e rasisturǎ gïndsarde kë le Rroma sas dośale thaj kë sas jekh "ciganosqo nasvalipen." I inreźistràcia e "cigojnerenqi" thaj e "manuśa kaj phiraven sar cigojner" anθ-e jekh ćentralo than kerdǎs kë von sas dikhle sar ćaće kriminalurǎ ferdi pala lenqi etnia kaθar e śingalenθe.

Telal o Nacionalo Socialismo (Nacizmo), o Zigeunerzentrale sas lokhes paruvdo te avel o Reichszentrale zur Bekämpfung des Zigeunerunwesens (Thagaripnasqo Ćentro te Marel e Ciganosqo Tràjo) anθ-o berś 1936 thaj anθ-o 1938 ćhutǎs les anθ-o Berlìn sosqe sas jekh lil kaj phendǎs kë trebalas te paruvel i organizàcia e Thagaripnasqe Kriminale Policiaqe. O Thagaripnasqo Ćentro sas jekh kotor anθar o neves kerdo Thagaripnaso Kriminale Policia Ofiso (Germanikanes: Reichskriminalpolizeiamts vaj RKPA), kaj sas prinʒardo sar o Ofiso V anθar o Thagaripnasqo Śerutno Sekuritatǎqo Ofiso (Germanikanes: Reichssicherheitshauptamts vaj RSHA). Khethanes e Rasialno Śuʒipnasqo Rodimatanqo Ćentroça (Germanikanes: Rassenhygienischen Forschungsstelle vaj RHF), o Thagaripnasqo Ćentro organizisardǎs vi i inreźistràcia thaj e durǎrimata hasnindoj o informaciaqo serviso thaj pala e informàcie kaj sas śajutne te kidel anθar e korkorre ʒene.

O "Cigojnosqo Serviso" sas kerdo maj jekh data anθ-o München anθ-o berś 1946 sajekhe gaʒença thaj ginavnǎqe-bazença thaj pala kodo sas anavǎrdo "Bi-kheresqe ʒene Serviso" (Landfahrerstelle) te aśundǒl maj xancï rasistikanes, ama kado anav sas vi anθar e Nacistikane vorbe. Atunć o Bikheresqeʒene Serviso sas jekh kotor anθar o Bavariaqo Statosqo Kriminalne Policiaqo Ofiso. Anθ-e berśa 1970e vov sas phaglo sosqe arakhle kë sas bi-konstitucionalo. Atunć e ginavnǎqe-baze sas dine ka-e ciganologurǎ (gipsyloristurǎ) kaj dikhle-pen sar anθ-e jekhfǎlno tradìcia sar o Rasialno Śuʒipnasqo Rodimatanqo Ćentro (RHF).