Pablo Picasso

O Pablo Ruiz Pikasò (gaʒikanes xramosardo: Picasso) (biǎndilo anθ-o Málaga p-o 25-to oktòmbra 1881 thaj mulo anθ-o Mougins p-o 8-to aprìlo 1973) sas jekh pintòro thaj skulptòro anθar i Śpania kaj kerdǎs khethanes e Georges Braque-eça o kubismo. Palal o Xindusthanesqo Konsìlo vaś Kulturàle Relàcie (englezikanes: Indian Council for Cultural Relations vaj ICCR), o Pikasò sas les Rromane orìgene

Vov si dikhlo deźa anθar o śirdipen e biśto śeliberśesqo sar jekh maśkar e maj bare pintòrurǎ kaj partićipisardǐne anθ-e ververutne artistikane miśkimata kaj buxlǎrdǐne anθ-o sundal thaj sas len bari influència pe avere bare artìsturǎ anθ-i vrjàmǎ. Pesqe butǎ si anθ-e muzèurǎ thaj kidimata anθ-sa i Euròpa thaj sa i ljùmǎ vaj sundal. So sas majbut, vov eksperimentisardǎs vi avere fǎlurěnça te kerel arta sar o ćitrisaripen vaj desèno, o ćokejisaripen vaj markevipen, pustikǎnqo desèno, o kipo-kerdipen vaj skulptùra, i ceramìka thaj o scenografipnasqo desèno thaj e aktoresqe gada vaś teatronqe prodùkcie. Vov xramosardǎs vi cïra literatura.

Anθ-i polìtika, o Pikasò phendǎs kë sas pacifìsto thaj komunìsto. Sas somdasno e Komunistikane Partidǎqo anθar Śpania thaj e Komunistikane Partidǎqo anθar Frància ʒi k-o mulo kana sas les enǎvardeś thaj jekh berśa. Si groposarime vaj praxosarime anθ-o pàrko e kastelosqo anθar Vauvenargues.